Plantun de Prouvènço

Pèr coumpara dos planto d'encò nostre

Crepis micrantha & Myosotis arvensis

Crepis micrantha

Asteraceae Compositae

Nom en français : Crépide à petites fleurs.

Descripcioun :
Aquéu lachassoun que nous vèn de Grèço, es uno planto primo, pulèu grando e proun ramificado. Li fueio basalo an despareigu à la flourido alor qu'aquéli de la cambo soun pichoto, entiero e embrassanto. Se recounèis peréu à si pichòti flour coumpausado (< 5 mm de long) en pinceloun (courimbo) d'ounte parton de long péu rede.

Usanço :
Èi bessai manjadis quouro soubro enca li fueio basalo, mai avèn pas d'entresigne segur. Escriéure au site se n'en sabès mai.

Port : Grando erbo
Taio : 10 à 80 cm
Fueio : alterno
Tipe bioulougico : Teroufite
Cicle bioulougico : Planto de l'an

Gènre : Crepis
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) enflourejado : 0,5 cm
Flourido : Printèms

Sòu : Ca
Autour basso e auto : Pancaro entresigna
Aparado : Noun
Abriéu à jun

Liò : Champ - Ermas - Tepiero
Estànci : Mesoumediterran
Couroulougi : Óurigino pountico
Ref. sc. : Crepis micrantha Czerep., 1964

Te-vese-e-t'ame(-de-champ)

Myosotis arvensis

Boraginaceae

Àutri noum : Ti-viéu-e-t'aìmi, Uei-de-l'enfant-Jèsu.

Noms en français : Myosotis des champs, Myosotis intermédiaire.

Descripcioun :
Aquéu te-vese-e-t'ame trachis di plano de coustiero fin qu'en mountagno. Es uno planto coumuno, mai pas toujour eisado de destria de si cousino. Dins lou group di flour pichoto (1 à 4 mm), soun pulèu li mai grando, si cambo soun un pau mai espésso (> 1mm), e emé d'enflourejado que fan mens de la mita de la planto. Se recounèis classicamen que li pecou di flour d'en bas dèvon èstre dous cop mai long que li sepalo di flour, mai sèmblo pas toujour lou cas.

Usanço :
Li flour podon se bouta dins lou mesclun. Se dis que li te-vese-e-t'ame soun vertuous contro l'enflamacioun, majamen pèr lis iue ("principe di signaturo").